Caucasus Build 2019-ს ECOWOOD-იც შეუერთდება

Caucasus Build 2019 11-14 აპრილს გამოფენების ცენტრ ექსპოჯორჯიაში გაიმართება და მასში მონაწილეობას 15 ქვეყნის 200-მდე კომპანია მიიღებს.

სამშენებლო აღჭურვილობა და ტექნიკა, სარემონტო მასალები, არქიტექტურული თუ საინჟინრო მომსახურება, ინტერიერის დიზაინი და ა.შ – მშენებლობისა და ინტერიერის 24-ე საერთაშორისო გამოფენა საუკეთესო შესაძლებლობაა დეველოპერული კომპანიებისთვის პარტნიორების აღმოსაჩენად.

ორგანიზატორების თქმით, მშენებლობისა და ინტერიერის გამოფენა არის ადგილი, სადაც დარგის სპეციალისტები მთელი მსოფლიოდან ხვდებიან ერთმანეთს, ამყარებენ ბიზნეს კონტაქტებს, ცვლიან ინფორმაციას და უზიარებენ ერთმანეთს ინოვაციებს სამშენებლო სფეროში, ხშირ შემთხვევაში კი ახალი პროდუქციის პრეზენტაციასაც აწყობენ. ახლად ჩამოყალიბებული კომპანიებისათვის კი, ეს არის შესაძლებლობა იპოვონ თავიანთი ადგილი ბაზარზე და შექმნან საწყისი პოზიცია ბიზნესის გასავითარებლად.

Caucasus Build 2019 11 აპრილს, 10:30 საათზე გაიხსნება და ოთხი დღის განმავლობაში დამთვალიერებელს ექსპოჯორჯიას მე-4, მე-5, მე-6, მე-11 პავილიონებსა და გარე სივრცეში მიიღებს.